Málþroski í móðurkviði

Málþroski barnsins byrjar að þróast snemma í móðurkviði. Það er því afar mikilvægt fyrir mæður og feður að vera dugleg við að tala við og syngja fyrir hið ófædda barn. Það þarf ekkert skipulagt prógramm eða æfingar frá sérfræðingum.

Konur hafa alltaf vitað þetta, en fóru svo að efast, þegar þeim var sagt af sérfræðingum að þetta væri tilgangslaust, að börnin þeirra skildu ekki eða jafnvel að þau væru heyrnarlaus. Verum óhræddar við að fylgja og treysta visku formæðra okkar.

En hvað á svo að segja við hið ófædda barn? Þið getið rætt allt milli himins og jarðar við þau. Segjum þeim frá því sem við erum að gera að hverju sinni; frá göngunni sem þú ert í, veisluna sem þú ert að fara í, hversu þig hlakkar til að sjá fallega andlit þess, finna lyktina og halda því í örmum þínum. Segðu barninu frá því hversvegna þú ert hrædd eða óörugg á þeim tíma, segðu því hversvegna þér líður svona vel. Þegar þú átt snörp orðaskipti við maka þinn, eða þið eruð jafnvel í harkalegu rifrildi, haltu hendi á maganum þínum og segðu barninu að það sé öruggt, þið séuð ekki að rífast vegna barnsins. Syngjið vögguvísurnar sem þið kunnið, syngjið fyir það önnur falleg lög, eða raulið litla lagstúfa.

Svo, þegar barnið fæðist, opnar augun í fyrsta sinn í þessum stóra og bjarta heimi, þyngdarlögmálið gerir fyrir alvöru vart við sig, kallt loft lendir á ofurviðkvæmri húð þess í fyrsta sinn, blóðflæði breytist og lungu barnsins fyllast lofti í fyrsta sinn; talaðu blíðlega við barnið þitt, bjóddu það velkomið, syngdu litla lagstúfinn ykkar fyrir það. Þú munt strax taka eftir ákveðinni öryggiskennd hjá barninu. Þetta getur verið sérlega mikilvægt hafi fæðingin verið þér og/eða barni þínu erfið. Lendi þú eða barnið í erfiðleikum og þið verðið aðskilin við fæðingu, er gott að sá aðili sem fylgir barninu sé meðvitað um þetta sterka samband sem á milli ykkar hefur þróast. Viðkomandi aðili getur þá talað við barnið, vitandi að barnið er vant því að það sé álitið fullkomlega meðvitaður einstaklingur.

Athugasemdir

[jóna björg (IP-tala skráð) 10.9.2007 kl. 16:27]

sundhedsplejersken sem kom heim eftir að ég fæddi Vöku spurði hvort við hefðum sungið mikið fyrir hana þegar hún var í maganum, hún sá hvað hún var örugg. Við syngjum alltaf fyrir strákana þegar þeir fara að sofa, svo ég get tekið undir að þetta virkar.

koss á þig